鍾舒漫索償勝訴庭外受訪 陳潔玲中途插入被鍾舒祺直斥冇禮貌

成件事真係好有戲劇性! © 由 星島網即時新聞 提供 成件事真係好有戲劇性!

鍾舒漫(Sherman)與前港姐陳潔玲去年因投資生意發生糾紛,鍾舒漫為4萬港元而入稟小額錢債審裁處追討款項。今日進行判決。鍾舒漫早上先由男友林灝軒及胞妹鍾舒祺陪同下抵達,數分鐘後陳潔玲與老公謝趠汎(Victor)亦到達大樓。最後判決指陳潔玲違反拆夥協議,裁定鍾舒漫勝訴,獲得索償費43,560元及訴訟費1,183元。而法官提到鍾舒漫所提交的投訴信指陳潔玲在法院範圍內拍攝她,但陳潔玲當場否認,法官提醒鍾舒漫若有需要可報案處理。

  鍾舒漫與妹妹鍾舒祺一起接受訪問,談到獲得勝訴的心情,鍾舒漫坦言一向有信心,只能有待案件完結才可分享感受,反而覺得身邊不時發生戲劇性事情,令家人感到疲倦。可會嚇怕再跟別人合夥做生意?鍾舒漫說:「唔會,但係我上咗好大嘅一課,各方面要了解對方嘅背景。希望事件真係完結!」此時,陳潔玲與老公突然出現,並要求一齊做訪問,鍾舒祺一口拒絕:「你真係唔受歡迎。」但陳潔玲未有理會,令到鍾舒祺不滿說:「你咁樣做真係好冇禮貌!」鍾舒漫隨即與妹妹鍾舒祺行開,陳潔玲成功騎劫訪問。

  陳潔玲表示尊重法院的裁決,又承認一直以來跟鍾舒漫溝通出現問題,當初應承給予貨品,其後要求對方簽協議書,原來自己違反拆夥協議,所以願意給予索償費及訴訟費用:「我唔會上訴,因為銀碼好細,其實爭拗係好小嘅事,我覺得成件事中間夾雜咗佢嘅男友喺溝通上有誤會,我原意唔係想跟佢敵對,由訴訟期間有多次嘅溝通同和解,我好願意畀返錢佢,好遺撼拒絕同我哋和解,先至去到呢個局面。」

  事件過程中陳潔玲坦言情緒上波動多,有時會鬧對方,大家亦有互相傷害,今日為止到此完結,若然對方感到傷害,願意跟對方道歉:「我知自己脾氣同EQ唔係咁好,今次覺得係好好嘅學習,學識點同人溝通。如果有個執念係自己懲罰自己。我唔會對任何人有憎恨,希望佢唔好有執念同憎恨,我當初同佢溝通唔好,令佢受到傷害,我願意同佢道歉,我只係普通人,唔叻同人溝通,脾氣又唔好。」

  對於陳潔玲一再要求想當面向鍾舒漫道歉,其後記者代為轉述,鍾舒漫斷言說:「唔使,心領啦!」談到被陳潔玲騎劫訪問,鍾舒漫坦言真的很戲劇性,不過對方經常做出好驚奇的事:「呢一年最攰係佢成日做出令人莫名其妙嘅事,法官講出判詞都好清晰,反而真係好想個戲劇完啦!(陳潔玲表示想跟你道歉?)如果真心,我當然好接受,最緊要真心,希望佢將來唔好咁樣做人。反而邊個對邊個執念唔太知,因為調番轉成日覺得佢唔想放過我哋呢邊,一路都同外界講我哋騷擾佢,其實係零!」

  今次索償只要求收回成本價,她坦言只想對方為事件負責任,其實四萬多元只是小數目,在法庭上多次表示願意和解,若對方真心願意接納也認為事件應完結,問到生意糾紛事件完結,可會開香檳慶祝?她說:「日日都好忙,但我真係晚晚飲!今日正式完結,都會食餐飯。不過家人都會問件事,依家可以好完滿,可以講唔使再擔心啦!」

  後來,又問到她投訴指陳潔玲在法院範圍內拍攝她,她表示有次在法院內的玻璃房間內整理文件時,現場有證人及同行朋友等,發現陳潔玲以電話拍攝他們:「嗰陣有朋友喺房外見到佢用電話拍攝我哋,其實法庭有CCTV,我哋唔會亂講,不過會報警。」至於會否因今次事件令雙方反目而感可惜?她說:「做朋友要睇值唔值得,本來同Victor係朋友,都好失望。今次睇到好多關係,但我身邊好多朋友、家人都冇得頂。呢件係無聊事,上咗人生一課,以後會小心啲。」

鍾舒漫索償勝訴庭外受訪 陳潔玲中途插入被鍾舒祺直斥冇禮貌